卅二回錯夢猶未夠
馮仁昭四圍超:雛鳳鳴擇地再開鑼

蘋果日報 2006/01/21 00:00


由梅雪詩(阿嗲)同龍劍笙(阿刨)主演、白雪仙任藝術總監嘅粵劇《西樓錯夢》,上年十一月公演時反應熱烈,主辦單位喺今個月四號至二十三號演多二十場。雖然前後夾埋做咗三十二場,但因為內部認購數目實在太多,公開發售嘅門票太少,搞到好多戲迷買唔到飛,無緣欣賞雛鳳鳴演出。
不過馮仁昭收到風,主辦單位為咗安撫呢一班買唔到飛嘅戲迷,打算喺今年內再度公演,只要解決場地問題就可以成事。
唔想細場做
噚日馮仁昭打電話向《西》劇策劃小組負責人高王玉琼求證,佢話:「我哋係有咁嘅打算,但香港文化中心同演藝學院今年個期好爆,如果搬去第二個場做,唔係座位少得滯,就係舞台太細搭唔到景,所以都要視乎場地問題解唔解決到。」
empty
白雪仙(右)擔任《西樓錯夢》藝術總監,對阿刨嘅演出甚至打扮都非常着緊。