九鐵或西鐵補錢畀西門子，好多工程界人士媽媽聲，得閒要搵惡佬明、建築邦了解吓。
今日嘅話題焦點唔係九鐵補錢，而係九鐵啲「密料」點解會爆。左丁山某日碰到記者Y，講起呢單新聞，記者Y細細聲話：「以我嘅經驗觸覺，同頂頭老細收到嘅電話，呢單嘢梗係有人通水啦。至於乜嘢人通水，唔講得畀你聽。」
咁神奇？記得《蘋果》李八方寫過呢單嘢可能有幕後黑手。九鐵自然唔值得爭，但揀喺過海新鐵路花落誰家之時爆料，事實上又係巧合一啲。唔理邊個爆都好，記者Y話市場競爭激烈，一啲公司鬥三煞之時，往往有人利用公關公司出橫手，寫匿名信去交易所、證監會告狀，就算查無實據，單係查一查，要對手澄清解釋，已經令對手煩到暈，而且重要使多啲律師時間（即係金錢），萬一一個唔好彩，過往紀錄冇keep得咁齊，證明文件一百件之中，欠咗一件，你就知死咯，分分鐘延期上市都似，而延一延之後，個股市話唔定冧咗，保薦人乘機縮沙，損失慘重矣。
記者Y見怪不怪，佢自己都收慣匿名信。佢就唔多鍾意啫。記者Y話：「本來做公關，各自表述，各自擦自己鞋，理所當然，但為咗競爭，而用到匿名信踢爆呢一招，是否下流，等啲公關專業人士自己判斷。」聽完佢咁講，冇法子唔驚暗箭難防，做人做事非行得正企得正不可。