【婚姻現暗湧?】諸葛紫岐暴瘦至80磅「有些東西爭不來」

蘋果日報 2015/10/01 06:00

蘋果微博諸葛紫岐暴瘦即時MarieNEWAY冰岐麟二少有些東西爭不來

人妻諸葛紫岐(Marie)同Neway二少薛嘉麟結婚三年,生埋囝囝「冰岐麟」,仲開經理人公司,準備大展拳腳,早前張栢芝遭向華強夫婦棄用,Marie曾表示想搵栢芝拍戲,不過之後冇聲氣。

最近Marie未知是因為公司壓力太大,定係其他原因,忽然暴瘦。上月初在港出席活動時,體重更跌至得八、九十磅,當時Marie表示因為公司準備開新戲,經常到北京開會,中港兩邊飛,壓力太大,故一個月瘦咗10至15磅。問佢瘦咗咁多,老公有冇話心痛?Marie就話:「佢有祝福我,話搵錢好辛苦,佢唔覺得我瘦係咩一回事。」

暴瘦之餘,Marie還不時於微博講佛偈或人生金句,如「不是每個人都會在原地等你,請珍惜。」難免引起猜想。今日凌晨Marie再貼文寫道:「我選擇寬容,不是我怯懦,因為我明白,寬容了他人,就是寬容自己;我選擇糊塗,不是我真糊塗,因為我明白,有些東西爭不來,有些不爭也會來!」是清醒之苦令Marie暴瘦?

今午《蘋果》致電Marie,其語調亦不復昔日爽快,似是若有所思。問其最新一篇微博是否有所指?佢就話:「我冇嘢回應。」再問是否婚姻生活出了問題?Marie就謂:「真係冇回應,我開緊會。」可是再問到若不澄清,猜測會更多時,Marie即連聲說:「冇冇冇,唔好諗埋一邊,我冇嘢回應。」續問是婚姻問題?佢話:「我冇嘢回應喇。」至於薛嘉麟就未能聯絡上。