上個月樓市一手同二手都靜咗，地產代理生意自然冇咁好，利記就只得一間分行條數可以過百萬，係西貢分行，蘭西聽講呢間分行6月主力做二手，促成嘅交易唔少係村屋，當然買家有好多係外籍客。

呢間分行點解可以做到咁多數，原來係有個鎮舖之寶客戶經理劉家璿（圖），淨係佢一個已經佔咗超過四十萬數，響今時今日都咪話唔誇張。
蘭西同劉小姐都有一面之緣，知道佢響利記西貢分行做咗好多年，而入行至今年年都係全公司嘅topsales，單係攞到嘅獎可以擺滿成張寫字枱。佢做得咁好，當然有人想挖佢跳槽，但佢都不為所動，對公司認真忠心。劉小姐為人都好謙虛，話有咁嘅成績，都係靠同事同上司幫助。

升職加薪刺激士氣
另外，利記赤柱同愉景灣分行過去半年表現一直唔錯，赤柱嘅譚維富同程素芳，上半年分別做到九十萬數，聽聞譚維富嘅代表作係南區東頭灣道33號成八千萬元嘅大deal。
利記就趁員工下半年再努力作戰之前，升職加薪，畀啲鼓勵同事咁話。