米杜士堡近日簽咗件澳洲後衞域馬本來係件普通嘅事，之不過唔係話過上個月三十一日係英超聯球員轉會限期嘅咩？米記豈不是做咗件戇居事？
咁又唔係噃，原來無論幾時，英超球會都可以簽啲冇合約喺身嘅自由身球員。
呢條例諗諗下真係唔錯，事關一方面球會可以各取所需，而一啲冇嘢撈嘅球員都可以搵份工，解決一下失業問題，而且重有番啲人情味㖭！
所以我求大俠相信，連新西蘭球會都唔要嘅肥仔嘜加斯居尼，同埋失緊業嘅前法國國腳真路拿，亦隨時可以再次喺英超踢波，咁都咪話唔令各位球迷感到突然。

雲格責英足總小心眼
英格蘭上周六友賽葡萄牙前，英足總將隊中嘅兩位阿仙奴軍醫開除，原因係其他英超領隊投訴佢哋有可能特別「關照」阿仙奴球員，重話唔定將其他球會球員嘅傷勢話畀阿仙奴知，而一般相信費爵爺係呢次投訴嘅主角。雲格為呢件事火都嚟埋，佢話醫生只會立心醫人，叫足總唔應該咁小心眼。