男會員加入女會員瑜伽班
健美中心被指誤導客戶入會

蘋果日報 2005/08/12 08:00


舒適堡美容健美中心會員黃先生稱,他與妻子及一女親戚共三人,上月十日途經荃灣眾安街舒適堡一流動推銷攤位,推銷員不斷游說他們入會,他們對舒適堡提供的瑜伽及健康舞班感興趣,即查詢入會詳情。
「當時個推銷員話,我哋可以揀選每個月一百六十六蚊,一次過交十二個月費用嘅PLAN(服務計劃),就可以到指定嘅健身中心參加一百二十堂瑜伽班或者健康舞班;我哋由於工作關係,就同推銷員講,一定要去尖沙嘴區嘅中心,即係喺彌敦道喜來登商場或者同樣喺彌敦道彩星中心嘅舒適堡玩,個推銷員話一啲問題都冇,重應承將原本送嘅兩節太陽燈療程,都可以改埋上十堂健康舞班或瑜伽班,獲得推銷員保證後,即場以信用卡簽帳付費每人二千元。」
黃先生稱,數日後他們到喜來登商場舒適堡查問健康舞班及瑜伽班時間表時,發現原來喜來登商場及彩星中心舒適堡的瑜伽及健康舞班,都只讓女會員參加,他是男會員,根本不能參加。
「我入會都係想同太太一齊做瑜伽,𠵱家我畀咗成年會費,非但唔可以同佢一齊做,重因為合約規定我只可以去尖沙嘴兩間中心,我根本唔可以參加;推銷員完全冇講清楚男人唔可以參加尖沙嘴兩間中心嘅瑜伽同健康舞班,就SELL我入會,分明係有心誤導!」
本報就投訴個案去信舒適堡美容健美中心查詢,惟該公司書面回覆稱,因對傳媒失信心,故不會回應傳媒查詢,但該公司樂意聆聽客戶提供之所有意見,歡迎客戶直接致電客戶服務部表達。
黃先生對此更為不滿,「對傳媒就話失信心唔回應,對我哋呢啲客人,又因為乜嘢而唔答覆呢?即係佢哋鍾意點都得,客人根本完全冇保障!」黃先生夫婦稱,會向消費者委員會投訴。
(○八○八○○一)

服務熱線
電話:29908288
傳真:23702192
電郵:[email protected]