發展商賣樓招數層出不窮，均來屯門茵翠豪庭就請來正申請健力士世界紀錄大全的金魚王「紅流金珠」坐鎮2周。金魚2歲大，長一呎，重2斤10両，較同類大3倍。唔知條魚嘅號召力，可以引來幾多買樓人士呢！

市區舊樓幾十萬
蘭西噚日響藍田等公司車，其間有人派「號外」（唔通有大新聞？），實情原來係長實派宣傳刊物。該公司將各報有關長沙灣泓景臺嘅新聞剪輯刊成「號外」，目的當然係等人留意佢嗰盤。而負責派刊物嘅仁兄，重擺咗兩幅好搶眼嘅廣告（圖）響度，等人一出地鐵站就睇到，認真高招。發展商一向都係假日先派傳單，𠵱家連平日都做埋宣傳，可見競爭愈來愈激烈。
因通縮效應，樓價由97年底跌到𠵱家，市區舊樓幾十萬已有交易，好似柴灣嘅單幢樓金源洋樓，據中原唐詠勤表示，B座高層7室，365方呎，啱啱以60萬元成交，買家為單身自置人士。令人有時光倒流之感。
蘭西