趙飛雲希望港股農曆年前可以造好啲嘅願望愈嚟愈渺茫，美股上周五出現回吐，杜指雖曾一度升穿50日線9937，高見9943，但好友顯然冇信心破關而上，杜指倒跌12點，收9907。納指獲利回吐更為明顯，跌1.2%，收1911。
不過，杜指暫時仍守20日線9903之上，加上10日線轉跌為升，仍有轉勢機會，希望今個禮拜有突破性走勢，帶挈港股做番好啲。此外，睇番呢兩日嘅報紙，一般評論都係睇淡港股，或者太多人睇淡，反為造就大戶挾一轉淡倉。

好友翻身靠滙豐
睇技術分析，淡友明顯贏晒，好友唔易翻身。太古A（019）及恒生（011）等強勢藍籌股嘅50日線上周亦宣告失守，反映跌勢更為全面。短期嘅希望係滙豐（005）喺86.50元完成築底，帶動大市回升。滙豐呢兩個禮拜喺86.5元至88.75元爭持，10日線（現處87.60元）已開始橫行，20日線（現處88.80元）正下降中，10日線一旦升穿20日線，將加強上升動力。不過，如果86.50元確認失守，將展開另一跌浪，帶動恒指下試一萬點。