當年今日

湊自由行熱鬧分一杯羹
馮仁昭四圍超:賭王、四姨太二千萬搞雜誌

蘋果日報 2003/12/28 00:00


賭王何鴻燊嘅四姨太梁安琪成立咗間多媒體公司後,呢輪正密鑼緊鼓搞一本自由行雙周刊,因為呢本雜誌係免費派發,創刊號會印十至十二萬本,𠵱家佢公司已經請咗四、五十人搞呢本雜誌,預計投資二千萬。

賭王全力支持
四姨太咁落本,睇嚟佢真係好有心想搞起間多媒體公司,聽聞自由行雙周刊成功嘅話,四姨太可能會再發展其他類型雜誌,佢似乎對傳媒業都好有興趣。
佢本自由行雙周刊預計農曆年開始出版,到時會有香港同澳門兩個版本,四姨太喺香港澳門都有生意,相信佢搞呢本雜誌,唔多唔少都會幫到旗下生意做吓宣傳,雖然呢間多媒體公司賭王冇份,但賭王背後就好支持四姨太搞呢本雜誌。

蕭正楠屎橋教蘭子
蕭正楠噚日去咗鑽石山,出席義賣曲奇活動。對於早前陳淑蘭唔見咗電話簿,蕭正楠就提議蘭子以後入電話可以用化名,就算下次再俾人執到電話簿,都唔會知道個電話號碼係屬於邊個嘅!
但係睇怕要打電話搵人時,連自己都唔記得佢係邊個,咁咪死火。
Rosanne唱歌撞爆牙?
商台噚日喺新元朗中心舉行「叱咤樂壇生力軍展望日」,一班有份競逐生力軍獎項嘅新人2R、吳浩康、林一峰、Sky、Boy'Z等都有出席,2R喺台上準備表演嘅時候,Rosanne被工作人員拍打頭部,手上嘅咪高峯撞親個嘴,事後問Rosanne有冇撞傷,佢話:「冇,我撞到啲門牙啫!」

舒淇為侯孝賢做波妹
舒淇繼《千禧曼波》之後,明年又將會同侯孝賢合作新戲《最好的時光》,原來早排佢哋兩個已經再見過面,當侯孝賢話想再同舒淇合作嘅時候,舒淇即刻表示非常願意。聽講新片中舒淇會做五、六十年代桌球室嘅計分女郎,但至於幾時開拍,以及男主角究意係邊個,目前就重未決定。
陳冠希何去何從?
陳冠希呢輪正忙緊錄唱片,英皇打算出年幫佢出碟,而最近就有雜誌話陳冠希會轉投EMI,經理人合約就由紅館公司同黃栢高嘅金牌公司共同擁有,噚日馮仁昭打電話畀紅館負責人,佢話:「冇咁嘅事,佢依然係英皇歌星,經理人約要同金牌公司瓜分就更加聞所未聞,陳冠希嘅經理人約只係紅館擁有啫!」

甄妮情傷愈再戰紅館
原本上月喺紅館舉行個唱嘅甄妮,因為同男友分手,要返美國療情傷,而將演唱會押後,點知後來甄妮同製作單位恒藝亞洲負責人丘亞葵鬧意見,搞到演唱會幾乎搞唔成,但馮仁昭聽聞甄妮同丘亞葵已經傾掂數,出年五月喺紅館開三場。不過,甄妮重會唔會搵番西城秀樹做嘉賓,暫時重係未知之數。
empty
自從開放咗自由行後,不少內地遊客亦喜愛來港消費同娛樂。
empty
蕭正楠
empty
Rosanne(右)
empty
舒淇(右)
資料圖片
empty
陳冠希
empty
甄妮
資料圖片