現年47歲的古巨基上月在社交網貼相留言，突然宣佈榮升為人父，原來老婆Lorraine去年底秘密在美國生B仔，基仔更為囝囝改英文名為Kuson，據知Kuson現在大約四個月大。雖然近月來基仔都忙於湊B，但他亦有留意及關心香港武漢肺炎疫情，早前更在社交網呼籲留家抗疫，防範疫情第二波來襲，減輕前線醫護人員的負擔。

昨日基仔在社交網留言呼籲大家留在家中防疫，而他更透露經由「古巨基醫療基金」成功訂購20萬個本地生產口罩，即將分批交給義工團體，再轉送給社區的老人家、低收入家庭及殘障人士等有需要人士。基仔在訂購口罩過程中絕不容易，因訂購數目大，因此曾出現過不少困難及波折，據悉他曾找到聲稱是南非賣家的製造商訂購，但後來經當地朋友幫助查探，發現對方竟提供假地址，幸好未有任何損失。除了險些被騙外，基仔亦曾成功訂購口罩，但豈料最後因封關而告吹，前功盡廢。雖然一波幾折，但基仔有感現在面對疫情，口罩是必須的消耗品；消耗又大，但價格仍未完全回落，基層市民未必能負擔，因此不放棄出手幫忙。

基仔昨日在社交網透露訂購20萬口罩幫助基層市民外，他亦貼出跟囝囝Kuson的互動新片，分享他做新手爸爸的湊B點滴，片中見基仔滿臉鬍鬚，不停逗睡在床仔上的Kuson，而小Kuson眼仔睩睩，基仔不斷向囝囝說：「洗手、洗手，記得洗手。」Kuson就不斷向爸爸展示四萬笑口，又舉起手仔，而基仔就笑說囝囝鍾意洗手，他留言：「我問小Kuson有甚麼想我代佢同大家講？我話如果我講中佢諗嘅，就用『笑』嚟示意啦！於是我就話：『洗手洗手洗手，記得洗手！』」
撰文：余嬌