股海實戰錄:節外生枝 好友難做

蘋果日報 2002/10/15 00:00


美股杜指上周四及上周五兩日共反彈564點,都可算不彈則已,一彈驚人。上周五早段所公布的經濟數據其實十分差,但一樣無法令美股回頭,反映貨源似在強者之手,當時心諗周一晚美股可能再出現一支大陽燭,以「三個白武士」升破8千關阻力,到時倉內嘅恒指Call輪應有理想回報。
可惜好事總是多磨,印尼峇里島大爆炸,又挑起全球恐怖襲擊的恐懼,今次更令人醒覺只要有大量「鬼佬」遊客的地方都可能成為襲擊目標,香港受襲的風險亦不宜低估。印尼出現這類嚴重災難事件,除了本身的貨幣及股市受影響外,難免會令人擔心有大鱷乘機再衝擊亞洲區金融市場。
上周趙飛雲一直有個問題諗唔通,就是港滙變弱的理由並不充份,現時財赤所引致的聯滙問題,充其量只是星星之火,但卻令人感覺似火燒糧倉咁嚴重,未知同今次印尼事件有無關連?自從911事件後,令世人理解到災難背後可能是政治目的,但同時亦係知情人士發災難財的機會。

恒指仍可見9000
噚日台韓股市普遍造好,似乎不太受峇里島事件影響,倫敦港股亦重返9000之上,不過外圍美股期指則偏軟。周一晚杜指只要能企穩或回吐輕微,港股今日應有機會重見9000以上,至於能否升破20日線9211阻力位,則不抱太大期望,希望可先守穩10日線9022之上,伺機再破關。
至於倉內嘅恒指Call輪9552,若有合理利潤會考慮食胡。
趙飛雲