我都係應承咗Dennis同佢食飯。講過擔心佢係花花公子嘅我，已經踏出錯誤一步，死未！
七點半，Dennis揸住佢架寶馬五系，車我去一間私房菜食Fusion。我哋又食又傾，冇停過口。食食吓，我發覺佢有口氣，可能因為碟蒜茸蝦炒飯喇。Dennis都發現咗，即刻尷尬SaySorry。好彩私房菜老闆話有話梅，我就叫咗杯烏龍茶加粒話梅落去浸一陣叫佢飲。佢飲完杯茶再食埋粒話梅，啲口氣真係無晒。Dennis望住我笑！真係好耐冇試過呢種感覺，幾年冇拍拖，𠵱家戀愛嘅感覺一下子湧上心頭。

食完飯之後佢車我返屋企，路上心諗同佢有得發展之時，前面有架的士切線太急差啲揩到佢架車，佢即時將最狠毒嘅粗口都爆晒出嚟。哇！我眼都凸埋，即時對佢改觀。要同佢發展真係要諗過先。唔係講笑，由「車品」可以睇得出人品呀！（五）