美股回吐好合理，港股唔跌有玄機。杜指周三晚大跌130點，但噚日恒指唔跌反升，真係要讚一讚春江鴨夠靈通，連盈富基金（2800）新一季只發售60億元都預知。
3月份港股踏入業績公布期，恒指好似入咗地雷陣，但暫時都好順利，炸彈拆完一個又一個，噚日連盈富呢個大炸彈都冇事。不過短期重有兩關要過，就係下周一中移動（941）及下周四長實（001）、和黃（013）公布業績。
中移動業績聲氣唔錯，有證券行預測01年盈利增長5成，市場憧憬有息派，所以近排股價造得唔錯。不過，大行因內地電訊業競爭日趨激烈，普遍睇淡公司未來幾年業績，美林預測02及03年盈利下降7%及5%，加埋增發流動電訊牌照及單向收費嘅隱憂，中移動後市點樣走，確係唔易睇。

和黃業績唔易估
講起唔易睇，和黃盤數真係好難估，港股21號嗰關可能最難過，如果真係大步檻過晒，恒指可以升破萬二點，確認新升浪。近排不妨留意歐洲電訊股走勢，應對和黃後市有啟示。經濟復甦，和黃碼頭業務肯定受惠，至於食粥定食飯要睇電訊業。