雖然經濟未見復甦，股市交投亦未見活躍，但跨國大證券行並沒有放軟手腳望天打卦。八方噚日知道，美資大行摩根士丹利被另一美資大行所羅門美邦撬走了一位重量級人物，呢位就係專門預測股市未來走勢的策略師賀加博﹙AjayKapur﹚同埋佢兩名夥計。
賀加博係印度人，專門研究亞洲區股市動態已有逾十二年經驗，剛剛被幾份財經雜誌同時選為最出色亞洲股市策略師。所羅門美邦過去幾年喺亞洲區的業務不算好出色，但去年起放手大搞，最先係從法國巴黎百富勤手上搶得「紅籌之父」梁伯韜做亞洲區主席，跟着去年底撬埋趙紫陽媳婦任克英做中國部主管，今月初又獲法國巴黎百富勤副主席范浩宏加盟。
無獨有偶，賀加博以前也做過百富勤策略師，看來呢個「梁氏班底」開始漸漸成形，只欠一個證券銷售部巨頭，八方倒想看看此君何時現身？
（圖）賀加博研究亞洲股市逾十二年，是業內翹楚。


E-mail：[email protected]