當年今日

新登場:
無國界日式料理獨賣自創健康菜

蘋果日報 2002/05/03 00:00


何謂無國界料理?呢個名詞早在十年前已在日本的餐廳流行,意思是一間餐廳提供不同國籍的創意料理,然而近數年,這種料理在日本已經愈來愈少,反而在香港興起。在中環開張數日的ZOMenu,便是一間由日本人主理的無國界料理店,餐牌內全部菜式均由大廚自己設計,以清新健康為大前提,味道與款式獨一無二,想知有幾獨特,就要落足眼力睇真吓。

記者:黃婉冰 攝影:伍慶泉
南瓜沙律
呢款無沙律醬、沙律油,又無雜菜嘅南瓜沙律都算係另類健康之選。將日本南瓜煮熟打茸,加人小量的鮮忌廉攪勻,伴上炸得香脆的蓮藕片、番薯片,材料非常簡單,但其健康、低脂成份已足以令一眾愛健美之人一食愛上。

試味報告:
南瓜茸入口軟綿綿,南瓜的甜香中滲着忌廉味,略嫌單調,可以用脆卜卜的蓮藕片或番薯片蘸着食,軟滑中又有香脆口感,最好都係食完唔會太過膩,反而愈食愈想食。
炸蟹柳粟米忌廉
吉列薯餅在日本最長青,但這款炸蟹柳粟米忌廉做法比薯餅繁複,先用牛油、忌廉、麵粉慢火煮成忌廉狀,再加入粟米粒、蟹柳,將混有蟹柳粟米的忌廉搓成球狀,蘸上雞蛋、麵包糠落鑊炸至外層金黃,唧上吉列豬扒汁、低脂沙律醬,與傳統食法無別。

試味報告:
外層麵包糠炸得香脆,無油淋淋的感覺,亦唔會過乾,內層有軟滑忌廉,粒粒粟米在忌廉中突圍而出,有吉列豬扒汁點綴,令味道添加惹味。
凍番茄沙律
大廚創新菜,向來都以健康為大前提,盡可能以少油烹調,這款凍番茄沙律,特別在用原個去皮番茄來做,番茄來自澳洲,其過人之處就係肉甜核少,維他命豐富,雪到凍冰冰,外皮淋上甘笋茸、洋葱、菜油、橄欖油打製成的汁,涼浸浸,酸咪咪,夏日「涼」品。

試味報告:
清甜,番茄肉厚多汁,去皮後食落啖啖肉無渣,但可能較重番茄味,所以甘笋汁未覺突出。
炸春卷條
餐牌內小食款式較多,全部都嬌小玲瓏,份量剛好用來佐酒,炸春卷就係其中一款,體形雖然變得袖珍,但內餡依然無馬虎,大廚揀選豬肉碎、洋葱、日本咖喱做餡,貪其夠香有咬口,大廚怕印度咖喱的濃重香料味令人難以接受,所以決定棄印選日。

試味報告:
春卷細細條,容易食,咖喱味香而不辣,春卷皮層數唔會太多,無影響口感,份量不多,反而少食多滋味。
怪味茄
一見怪味兩個字,就知呢款菜夾雜着中菜元素。大廚以日本人最喜愛的烤茄子加入中菜中最出名的怪味汁,中、日拍住上,共同擦出新口味。茄子烤過後去皮,用橄欖油、蒜頭、日本芫荽、日本醋、日本醬油、薑同辣椒煮成怪味汁,凍汁淋在熱茄上,盡顯日本的地道飲食文化。

試味報告:
茄子無加任何油份燒熟,入口依然軟滑,無中菜走油般油淋淋。怪味汁味道一啲都唔怪,味道帶有少少辣,少少酸,味道頗特別。
香蒜炒飯
先此聲明,不愛蒜者請肅靜迴避,皆因這碟以大量蒜茸炒成的炒飯,未食已蒜味四溢。選用煙韌的日本珍珠米,加入大量蒜茸、蜜糖豆、葱花、甘笋粒、雞蛋同炒,飯面鋪滿炸白飯魚,香脆白飯魚的加入,令炒飯變得更可口。

試味報告:
未食已經有好香蒜味直攻鼻哥,但食落蒜味唔會過份濃烈,飯粒反而炒得夠乾爽香口,煙煙韌韌有咬口,有炸白飯魚相伴,令炒飯變得不再單調。
店名:ZOMenuJapaneseModernBar
電話:28691470
地址:中環威靈頓街98-102號翡翠中心2樓 
營業時間:星期一至六中午12時至下午3時,晚上6時至午夜12時;星期日及公眾假期下午5時半至晚上11時半。
座位:80個 付款方法:現金及信用卡(Visa,Master,Diners)