即將卸任嘅國務院總理溫家寶今年3月表明，好想去多次香港，尤其想重訪03年沙士「發源地」淘大花園。殊不知溫總理呢句客套話，令到淘大花園業主委員會聯會主席葉興國高度關注，喺4月8號寫信畀溫家寶，擦鞋話多謝日理萬機嘅總理仲掛住淘大花園情況，實在萬分激動，呢名「梁粉」仲託梁振英訪京時轉交信件。
有來有往係中國人嘅禮貌，中聯辦副主任楊建平噚日就親自向葉興國，送上溫家寶4月15日嘅親筆回信，大致係話九年前到訪淘大嘅情況，至今歷歷在目。葉興國慌死人唔知佢「執到寶」，話會出通告兼且將封信貼喺屋苑內，等全屋苑嘅居民都感受到總理嘅愛喎。