當年今日

秒秒鐘想結婚唔係假
馮仁昭四圍超:華仔簽名會錫晒小朋友

蘋果日報 2002/08/11 00:00


劉德華(華仔)噚日喺尖沙嘴海港城,出席「美麗的一天」簽名會,現場吸引咗近千名歌迷到場支持,唱片公司重播放咗華仔兩隻新歌《練歌》同《黑蝙蝠中隊》嘅MV。當大家耐心等候華仔簽名期間,有女歌迷更以國語高呼:「劉德華,我愛你!」華仔聽到當然非常開心,佢重即時用國語反問台下嘅fans:「是誰?」

朝早六點排隊
華仔日前接受電台訪問時,曾經話秒秒鐘都會諗結婚嘅問題,重話係時候生BB,而噚日佢見到歌迷帶住可愛嘅BB嚟,即刻抱住影相,對其他小朋友fans亦十分熱心。而排第一嘅歌迷為咗攞到簽名,噚日朝早六點幾就嚟排隊。
華仔嘅新歌《黑蝙蝠中隊》MV係用泥膠公仔拍攝,華仔話:「個公仔係我一個韓國朋友製造,但𠵱家重未知會唔會攞嚟賣。我呢個韓國朋友係我嘅歌迷,佢呢次收我半價。」對於新碟喺東南亞一開售即賣咗四十萬隻,華仔好開心話:「隻碟唔係自己出,都係唔做老闆,打工好啲。」

葉蘊儀贍養費一定要追
葉蘊儀噚日喺灣仔會展為「第十屆國際嬰兒、兒童用品博覽會」做開幕剪綵嘉賓,問番佢向申請破產嘅前夫陳柏浩追贍養費件案進展成點,葉蘊儀話已經交畀律師去搞,幾個月後再上庭。
葉蘊儀話,如果一個人要破產都冇辦法,目前最緊要係做好自己。不過追討贍養費係應該要做,呢樣係個人責任問題。
楊崢Pius直認男女朋友
一直盛傳拍拖嘅楊崢同髮型師Pius,噚日喺灣仔嘅「詩芬發現耀眼星途」活動上同場出現,對於兩人係唔係拍拖,Pius就話:「我哋可以話係未公開嘅男女朋友囉,因為對方唔想公開住嘛。」轉頭問番楊崢,佢就話:「Pius冇講錯吖,我哋的確係成日見嘅好朋友,直頭係知己㖭。」

伊健有三位姐級Fans
鄭伊健喺日劇《香港明星迷》入面,將會客串做番自己,前日有關方面喺東京舉行記者會,伊健都有畀面出席。三位有份主演嘅日本女星山本未來、藥師丸博子同室井滋,喺套劇入面都係伊健嘅超級fans,早排佢哋嚟過香港拍戲一個月,而伊健更大爆三位家姐級fans,喺香港到處狂食㖭。

關心妍向毒品SayNo
樂壇新人關心妍前晚喺高山劇場出席一個禁毒歌唱比賽,關心妍以前喺加拿大讀書,佢話朋友嘅朋友都有接觸過毒品,不過關心妍話:「我自己就冇見過毒品,連試都冇試過,就算減壓都唔會用呢啲方法。以前細個唔試,𠵱家更加唔會試。」
余安安唔怕丈夫見靚女
余安安噚日以主禮嘉賓身份,出席喺尖沙嘴搞嘅「浦東世紀花園答謝酒會」,問到佢老公李萬祺被雜誌影到同個性感女郎蒲蘭桂坊一事,余安安氣定神閒咁話:「老公做PR呢行,梗係多應酬,咁去應酬唔係男就係女㗎啦,做夫妻咁耐,係要互相信任嘅,如果吓吓懷疑佢,我咪好辛苦?」

向海嵐蛋白護髮DIY
向海嵐噚日喺灣仔出席詩芬一個美髮活動時,大談護髮心得,佢話自己好懶,好少去髮型屋護髮,多數放工後自己喺屋企搞掂。
向海嵐話:「好簡單㗎咋,搽啲蛋白喺啲頭髮度就得,呢個方法既慳錢,又慳時間,而且真係得嘅㖭!」