每日睇《蘋果》娛樂版都見BoBo張相，人氣認真勁，睇BoBo最過癮之處，係佢身上着衫配襯，十足十銅鑼灣街頭𡃁妹，腳上對Nike唔係別注都唔着，件衫唔係Bapy就係Neighborhood，極富親切感。以前BoBo只不過獨愛家樂商場買減價SuperLover，自從同壞孩子E傳緋聞後，BathingApeGoodEnough瑯瑯上口，邊個同邊個Crossover一清二楚，水貨天后利時祥嫂隨時被佢拋窒。
壞孩子E本身亦係頭號裏原宿迷，因為工作忙碌，唔可以成日親身飛過日本入貨，只有求救於利時D，每次幫襯過萬銀是等閒，利時D好識做，每次壞孩子到訪，會喺舖頭圍上白布避免騷擾；但老人家見到就話大吉利是，以為有白事，話應用紅布代替白布，今次可謂潮流文化衝突，所以利時D最近塊白布都少咗出場。
其實𠵱家娛樂圈中人都好流行着裏原宿牌子，除咗林曉峰自己掏荷包買孖Taps上勁歌外，錢嘉樂都趁日圓跌大手掃Ape，下次見佢表演危險動作時着住成身Ape都唔使驚訝。重有黃玉郎、馬榮成、梁光明都係裏原宿教徒，每個月都花唔少錢買戰衣。佢哋有個共通點，大部分衫都幫襯番香港嘅水貨舖，一於留港消費齊心救港。

主持人：大食Jack
八卦熱報：[email protected]