細路豪慶祝九歲生日，父母為佢搞生日會，呢個小子平時頑皮到極，鍾意跆拳道、游水、打網球，故此渾身肌肉，打佢十拳都唔會嗌痛，一日到黑跳跳紮之人，點會有心機坐定定讀書吖，所以父母捉佢做功課、默書、背英文，真係頭痛到極，辛苦過返工。
生日會上，豪仔居然識講故事，講諸葛孔明草船借箭，講得頭頭是道，用字文雅，左丁山幾乎唔敢信自己對耳，呢隻頑皮仔唔通在小學停課期間，困在屋內，日日讀故事書？如果係咁，停課好過上學噃！

非也。豪仔阿媽話：「停課幾個星期，聽親戚介紹，上『網上中華』（中華里）www.chinalane.org ，引豪仔睇歷史故事卡通。佢睇睇吓，鍾意咗，日日上網聽歷史故事，『草船借箭』就係其中之一，其他重有好多。故事有廣東話版本同正宗普通話版本，亦有文字說明。豪仔肯聽唔肯讀，如是者聽咗幾個星期，佢上咗癮，開始肯睇少少咯。」引誘細路讀書，父母要好有耐性，譬如豪仔肯自動上中華里個網，已係成功嘅第一步，跟住或者可以買啲《三國演義》漫畫故事畀佢睇，睇到入神再升級，買淺白白話《三國》，最後去到小學六年級，就叫佢睇羅貫中《三國演義》！細路豪咁好動好玩，都俾中華里吸引，文靜細路女相信更容易。呢個網話專為小學生學習中華文化而設，為人父母者不可不注意。