今日凌晨時分，花旗國中央銀行聯儲局就開會議息，不過因孫柏文截稿時間比聯儲局出聲明早好多，所以要聽日先至可以幫大家解讀。今日，我想同大家講一單「大蝦細、畀屎餵」嘅個案。
孫柏文作為一個典型70年代末出世嘅男人，屋企裏面曾經有好多不同種類嘅電子遊戲機。例如，我曾經有過任天堂紅白機、NECPCEngine、超任、世家16-bit、GameBoyColor等等嘅遊戲機，不過因多年來時代進步、轉變，直至到前晚，我屋企就淨得一部SonyPlayStation。不過，到噚晚我就用鎚仔將部SonyPlaystation完全粉碎咗。
大家可能會問：「點解孫柏文要咁激動，將部SonyPlaystation打爛？」我咁激動嘅原因，係因為Sony迫死咗一間我哋特區喺外國年輕人心目中非常出名，叫做「力生」lik-sang.com嘅公司，嚴重侵犯私人產權，企圖剝削世界「打機」消費者，所以我要洩憤、抗議。其實，「力生」做嘅生意好簡單，就係我哋俗稱「水貨」嘅生意，「力生」首先會喺日本等地買入只得當地有得賣嘅最新型遊戲機，或者喺售價比較平嘅地區入遊戲機貨，跟住喺自己開嘅購物網站lik-sang.com，賣畀全球機迷。咁做，製造遊戲機嘅公司當然唔會開心，因為無法區別某地區，可以出高價、被搵笨嘅消費者。
「力生」呢間香港公司服務有幾好？價錢有幾低？速度有幾快？最好問Sony喺歐洲班高層，因為當年Sony喺日本推出PSP手提遊戲機嘅時候，就連佢哋班高層，都係問lik-sang.com買，先至可以得到最新嘅PSP。

九流公關嘅答案

不過，今次Sony迫死「力生」嘅方法，就係喺歐盟裏面每一個國家，都起訴「力生」，話因為「力生」做「水貨」生意，所以侵犯Sony嘅知識產權。「力生」作為一間「行得正、企得正」嘅香港小企業，又點可以支付龐大嘅律師費，喺歐盟每個國家都辯護喺香港好合法、正當嘅「水貨」生意？Sony喺咁多個國家起訴「力生」，就好似漁翁撒網一樣，希望可以求其撈到一個有利嘅裁決，跟住要所有歐盟國家同時執行裁決，迫死「力生」。
Sony話要迫死「力生」嘅原因，係因為要保障歐盟消費者人身安全。因為全球各國用嘅電壓唔同，所以其他地區購買嘅PSP喺歐洲用，可能會有危險。首先，唔通Sony想講喺日本或東亞地區售賣嘅PSP有危險？會着火？大佬！「力生」賣嘅係SonyPSP，而唔係Sony嘅手提電腦電池。不過「力生」都有答，話佢哋賣嘅係Sony原裝正版、全球通用PSP火牛，由110伏特至到240伏特電壓都可以。所以我一定要用隻金手指去篤爆Sony嘅九流公關答案。
呢場風風雨雨牽涉嘅係，究竟我買部機之後，財產嘅產權是否歸我。如果「力生」可以合法購買一部PSP，咁因為部PSP係「力生」嘅，佢哋應該可以對部PSP鍾意點就點，拆開來睇得，改機又得，當然賣咗去都得。如果「力生」賣機係違法，就等於就算Sony賣斷部機畀你，Sony對你部機仲有控制權，咁噚晚我打爛部SonyPlaystation，我咪分分鐘可以被Sony告，要坐監？
最後，就算Sony今日可以蝦蝦霸霸，我敢保證天一定有眼，Sony會衰收尾被天滅。大家可以放長雙眼睇吓佢哋一拖再拖嘅Playstation3會點樣蝕本，Sony有報應。