在電影《麥兜故事》入面，麥太就教煮紙包雞包紙，佢話：「紙包雞，雞包紙，紙包雞包紙……」其實包嘅過癮之處，往往就係包來包去，唔打開都未知裏面包住啲乜。要包得好，包得出色更加唔係人人都做到。鑽石山飯廳郭師傅，有「包搞掂」之稱，糅合中西日手法，自創多種包法，出來的一系列「包菜」，點樣包，裏面包啲乜，真係包你估佢唔到！

記者：梁學文　攝影：楊錦文

無師自通乜都包一餐

鑽石山飯廳的廚師郭師傅，外號「包搞掂」，無論是日式飯，或者是西式意粉，佢都可以用來做餡，可以話咩都包得一大餐，唔睇餐牌你未必估到他包的是甚麼。原來「包搞掂」郭師傅從沒有跟過大師傅學廚，可以說是無師自通。郭師傅煮理西餐十多年，他最拿手當然是包嘢，尤其是包紮肉類，他真的甚麼也可以包得到。他說：「我係做西菜出身嘅，最初嗰陣我學法國菜同意大利菜，學到點樣配搭。之後就學包嘢，一包就唔停得手。好多嘢包咗個賣相好好多，變得更有睇頭，咁你都食得開心嘛。」

包嘢最重力度控制

自從七、八年前郭師傅開始包嘢後，他就愛不釋手。他包的菜以西式為主，問到要包得出色秘訣為何？師傅說：「其實包菜指頭功夫一定要夠幼細，最緊要係控制好力度，好似包肉就要比較出力，但係包麵就要細細力。」他的創作，靈感往往來自生活，就算去旅行都會特地抽時間學習當地餸菜。包得出色，郭師傅喺9月更會參加旅遊發展局舉辦的「美食之最」比賽，𠵱家我哋就有機會睇吓參賽作品，即Check啦！

牛肉打包StepbyStep

沙茶布袋牛肉$128

（套餐跟餐湯、咖啡或茶、缽仔糕）
這就是郭師傅將會用來參加美食之最比賽的作品，是一道中西日合璧的Fusion菜。郭師傅話這個菜的靈感是來自牛油紙，他說：「有一日我見到張牛油紙，咪諗住用來包吓菜，但係牛油紙唔食得，咁我就諗到用腐皮試試，出來個效果又唔錯喎，咁就用來參賽。」布袋牛肉個外形似足日式小包，賣相和做法就是西式，腐皮入面就包住中式沙茶牛肉，估不到包一包又幾夾。牛肉入口有菠蘿香味，外面腐皮焗完又好脆，口感特別。食時記得加兩滴青檸汁，味道就更清香。這個作品現在還跟另一款比賽的甜品紅棗缽仔糕，讓你可以先試為快，但製作需時，大概要等20-30分鐘！（只限晚市供應）

香辣泡菜扒烏冬$48

如果唔睇餐牌你估唔估得到這是甚麼？這款日韓Fusion蛋包烏冬，味道辣中帶甜幾特別。烏冬入口會有少少辣，但吃多一啖，你就會發覺有甜味出來。扒烏冬的扒是雞扒，煎香過的雞扒非常香口。

生薑燒豬頸肉飯$58

用泰式汁醬烹調的蛋包飯，包着豬頸肉，好有東南亞的風味。最厲害是這個飯的蛋包，煎得勁薄，煎同包的工夫少一點也不可，任何一樣材料出問題，個蛋包都好易會穿。

紅酒焗羊仔膝麵包球$38/小

師傅先爆香洋葱、紅椒和青椒等，然後加入紅酒和燒汁做醬。最後就將汁加入已燜腍了的羊膝中，再入焗爐焗兩個鐘到就可以。做法雖然簡單，但味道豐富。羊肉的肉汁味濃，配合麵包，非常惹味。

鮮茄焗法國藍青口麵包球$75/標準

郭師傅：「雖然這款包菜，就真係得個麵包個包字，我無得包，但係我都好鍾意做，而且都好好味㗎！」挖空了麵包球後，就釀入意粉，再加入新鮮番茄和青口，味道酸得來又帶點海鮮鮮味，有番茄就一定好醒胃。

白汁紙包海鮮意粉$68

海鮮材料有鮮蝦、蟹肉和青口等等，用白酒煮一煮，然後放入牛油紙中，捲成糖狀，再放入焗爐焗就完成。這款賣相特別的白汁紙包海鮮意粉，是郭師傅所創製的，外形真的很有趣。

食客有Say

飯廳（26280662）
地址：鑽石山荷里活廣場2樓234-236號舖
營業時間：11:30am-11:00pm
座位：約150個