我求大俠不得不佩服賓尼迪斯，呢位西班牙教頭真係獎盃保證，佢喺上周六帶領拿玻里喺意大利盃決賽以3:1贏咗費倫天拿，首季執教就有盃落袋。睇番肥賓份履歷，咪話唔神奇，佢成名之後每帶一支球隊，第一季都必定有盃捧！

呢場意盃賽前當地發生槍擊事件，盛傳3名拿玻里球迷中槍，仲話其中一人傷重死亡；有拿玻里球迷組織更要求場波改期舉行。後來警方證實冇人死到，槍擊亦同場波冇關。拿玻里隊長咸錫親自向球迷澄清，最後場波都遲咗成40分鐘先開始。此外，有人喺球場內掟煙花，導致有個消防員受傷。

講番場波，拿玻里好快入局，22歲意大利前鋒恩斯治尼分別喺11同17分鐘入波，幫拿玻里一早就領先2:0。之後拿玻里受壓，費倫天拿喺28分鐘靠祖安華加斯追番球。79分鐘，拿玻里仲有恩拿兩黃一紅被逐，但好在梅頓斯喺補時階段建功，幫拿玻里以3:1搞掂費倫，捧到球會史上第5個意盃錦標。
最威水都係賓尼迪斯，首季教拿玻里又有盃捧。由教華倫西亞嗰陣數起，佢教過5間球會，5次喺執教嘅第一個球季都有冠軍，最經典莫過於04/05球季帶利物浦拎歐聯。上季肥賓嘅遭遇亦神奇，做咗車路士嘅暫代領隊半季都攞到歐霸盃，唔到你唔服！佢賽後大讚隊波：「我哋一開波就控制戰局，先入兩球，但之後費倫反攻。其實我哋嘅第3個入波可以早啲出現，但好在防線表現得好好，就算10打11都冇問題。」肥賓仲話梅開二度嘅恩斯治尼應該入選國家隊踢世盃。

另外，隊長咸錫贏波後立即搵噴劑染到成頭藍色先去捧盃；賽後有記者問佢會保持呢個髮型幾耐，咸錫有啲怕醜咁話：「隻藍色應該洗得甩啩，希望可以甩到色啦。」