當年今日

701收料站:彩星傳快有動作

蘋果日報 2003/08/25 00:00


小型工業股早排接連搞批股,傳聞在名單之列的彩星集團(635),則遲遲未見有動作,只見股價暗暗上升。經紀黃話,聽講話因為重未到價,所以暫時唔批得住。
自從彩星8月初公布,截至2003年6月底止中期業績由虧轉盈,股東應佔溢利991萬元,兼夾有中期息1仙派之後,無論股價同埋成交都出現上升之勢,上周五收0.99元,升6.45%,成交高達1410萬元。
經紀黃話,彩星去到呢個價,睇嚟再爆多一陣煙花後,就距離抽水之期不遠矣,加上近期接連幫多間工業股搞批股的一間證券行,亦出報告極力推介,迹象相當明顯。
究竟彩星有幾好?支持者當然話前景秀麗,但賣點仍然係小初靚仔時期已經流行嘅忍者龜,唔通家陣興懷舊?
至於彩星老闆家族之中,好似有人重揸住唔少貨,唔知會否影響股價升勢?但經紀黃話,據聞有人已經沽咗唔少貨,但股價仍然撐得住,就證明影響唔大。
慕容小初