內地電視機一哥TCL集團不經不覺成立咗27個寒暑，創辦人兼董事長李東生前日接受《21世紀經濟報道》訪問，話TCL成功之處係擁有務實創新嘅基因，公司過去嘅發展都係跑喺改革之先，佢形容TCL每一步都係「敢為天下周先」。
TCL為李東生帶嚟唔少名同利，曾經畀美國雜誌《財富》評為「2003年亞洲年度經濟人物」，亦俾《時代》周刊評為04年全球最具影響力商界領袖，更兩度獲選中央電視台嘅年度經濟人物。

寫文談逆境自處

不過，講到李東生最難忘嘅經歷，莫過於04年TCL收購法國湯遜（Thomson）電視機業務，同埋旗下TCL通訊（2618）合併阿爾卡特（Alcatel）手機業務，結果拖累TCL業績，搞到公司連續虧損兩年。07年李東生仲俾《福布斯》列入為最差上市公司老闆名單，到舊年TCL先扭虧為盈，賺3億幾人仔。
透過呢次海外收購經驗，李東生鍛煉到「自我復修能力」，佢話：「TCL的自我復修能力是逼出來，因為人不能垮下去，最困難的時候有一個信念支持我，就是我們不能垮下去，TCL的成敗對團隊和員工生死攸關。」喺呢個逆境中，李東生仲寫咗篇文，題為《鷹之重生》嚟同人分享呢次經驗。