新一屆區議員元旦日履新，正所謂「新人事新作風」，唔少新議員都表明會推動區議會變革，除咗議會要直播，仲有建議話要改開會時間。八方就聽聞，九龍城區議會醞釀改開會時間，目的就係阻礙民建聯雙料議員兼黨主席李慧琼開會，但就未有共識。

今屆區選雖然民主派大勝，但部份建制橋頭堡仍然未除，好似長毛梁國雄就喺九龍城土瓜灣北挑戰李慧琼失敗，以343票些微差距落敗。雖然李慧琼僥倖保住議席，但因為九龍城區有15名民主派當選，民主派可以執掌議會。

大權在握就可以推動變革，有人就建議將開會日子改去星期五，等目前仍然等緊內會選舉主席，唔知幾時可以做內會主席嘅李慧琼撞時間，意味李要喺區會立會二選一，令佢魚與熊掌，不可「雙料」兼得。但八方聽聞建議未獲所有人同意，都要再喺民主派內部討論。

極大機會做九龍城區議會主席嘅民主黨蕭亮聲承認聽過有關傳聞，但否認有相關建議，話若果要改開會時間都要有好多嘅討論，但無排除有關可能性，「其實如果要加小組都要加會議時間，所以為咗遷就而改大會時間，都係唔出奇嘅」。

-----------------------------

民陣元旦大遊行