喺九鐵風波後退任嘅前九鐵CEO黎文熹，𠵱家逍遙人生，喺中大讀哲學碩士，佢喺九鐵做咗20幾年，離開時同其他退休員工一樣，獲得一張退休員工車票，可以一世免費搭火車。佢接受中大新聞與傳播學院刊物《Varsity》訪問時拎住張車票影相，雖然兩鐵已合併，但呢張免費車票仍然只限搭以前嘅九鐵線，其他嘅就要畀錢。
黎文熹話為九鐵文化消失感到可惜，見到前下屬換上港鐵新制服都幾感慨，佢又指合併只係慳到好少行政費，冇估計咁多。佢強調暫冇計劃出山，更加唔會再做公共企業。