劉嘉玲對故鄉蘇州真係有好深感情，每年都會抽時間返家鄉探吓親朋戚友，上年仲好豪氣咁用成千萬喺當地買咗間萬呎別墅，聽聞係買嚟度假用。咁又係嘅，嘉玲成日返去度假，咁就唔使住酒店喇。

日前嘉玲又去咗蘇州，幫家鄉嘅旅遊推廣活動做宣傳之餘，仲抽時間去咗當地著名嘅寒山寺參拜。呢間寺廟香火好鼎盛，上個禮拜五，寒山寺咁啱舉行祈福會，嘉玲當然去參加啦。因為嘉玲係大明星，佢喺寺廟出現時，啲人見到佢即刻好興奮，而寺院就喺門口掛晒歡迎橫額，仲出動十幾個和尚為嘉玲誦經。嘉玲喺祈福時好誠心，就算俾其他人望住，佢都冇任何反應。
其實嘉玲同寒山寺好有淵源，上年年初，寺內嘅秋爽大師送咗兩幅親筆書法畀嘉玲，祈求佢家宅安康。