【短片】【蘋果基金】父母先後患癌小姐妹命途坎坷

蘋果日報 2015/05/16 06:00

肺癌蘋果基金脊骨阿世C3723

「點解個天咁懶,劇情一模一樣?呢啲劇本喺電視台播都畀人鬧啦,點解要發生喺我個女同女婿身上呢?」阿世的岳母無語問蒼天,皆因前年女兒乳癌離世,兩名年幼孫女失去媽媽,去年輪到女婿患上末期肺癌,生命開始倒數。只有12歲的大女仍活在喪母陰霾,她知道爸爸患絕症,跟爸爸若即若離;6歲小女兒天真爛漫,未懂人間生死。兩女將升讀中學及小學,三父女各有心事,阿世坦言為了兩個囡,只要一絲希望都不言棄,「即使見唔到啲女談婚論嫁,都希望陪住佢哋開心一日得一日。」

記者:馮詩媚金敏琍

「始終媽咪走咗好短時間,媽咪2013年走,2014年到我喇,可能太近喇,大家唔想講。」一家四口原本生活美滿,對阿世來說已經不能復再,就在前年愛妻患乳癌逝世開始,人生徹底改寫。為了將兩名女兒從悲痛中拉出來,原本他已收拾心情,從新出發,去年復活節更帶一對女兒到台灣旅行散心,「2014年4月最後一個星期六,我送細女去學跳舞,嗰日都覺得對腳有啲問題,點知第二日瞓醒,郁都郁唔到,自己開始驚,即刻叫救護車。」
驗身報告帶來噩耗,他被證實患上末期肺癌,癌細胞亦擴散出現骨枯:「最初發現脊骨第4段塌骨,壓住神經線,入院發現原來係癌細胞影響導致,要做手術取走幾段骨,抽走癌細胞,換上幾節金屬支架撐住。」
「都唔知點同佢哋講,梗係想畀好的一面佢哋睇,唔想佢哋擔心。」阿世平日很少向女兒透露病情,亦不在她們面前流露軟弱一面,寧願獨自死撐,「撐得幾耐得幾耐,呢一日始終會嚟,不過唔知,撐囉,撐到捱唔住為止。」
 
思念愛妻,又要抗癌,這位爸爸盡量表現堅強一面,可是長女卻將掛念媽媽的悲痛、擔心爸爸的無奈藏在心底,就是不希望患病爸爸擔心,「有時會講,如果爹哋走咗,邊個照顧我哋呢?嗲哋聽到後會自己匿埋喊。」
離去,在阿世預計之內,最不放心是兩女:「大女從媽咪過身開始變得沉默,怕有一日佢會鑽牛角尖;細女可能唔太清楚發生緊咩,但知道爸爸有病,會畫畫氹我開心,有時仲專登掉嘢落地叫我幫佢執,話訓練我做運動。不過聽學校講,上年母親節個個(學生)都送花畀媽咪,佢就自己匿埋一角,唔開心。」由笑說到喊,阿世只想和女兒「過得一日得一日」。
與妻子同樣患上癌症,阿世未有抱怨,「我DNA改變,百份一嘅事都發生喺我身上,真係無話可說,不過依家感受到太太當時患癌嘅痛楚。」面對現實,他看過多份醫生報告,指患肺癌病人多數只能活得兩、三年,「我想見到細女(6歲)小學畢業,大女(12歲)中學畢業,甚至入大學,最少要多6年命,希望有奇蹟出現。」
用標靶藥治療半年無效,剛進行完第6次化療,阿世連行路都乏力,女兒由岳父岳母照顧:「我走咗之後,剩返佢哋兩姊妹互相依靠,希望佢哋唔好鬧交,要互相關照,大個幫爸爸媽咪報答婆婆公公,父母做唔到,要靠佢哋。」

現時阿世每月化療藥費逾2萬元丶對一家三口靠7000元綜援過活的他們實在無力負擔,他感謝曾捐款幫助的有心人,承諾堅強活下去。
在過去三個月,阿世的治療肺癌標靶藥費已逾6萬元。盼善長繼續施予援手,令阿世可安心用藥醫病,以免兩名女兒失去父親。

「阿世」捐款編號:C3723
網上捐款: http://bit.ly/1nQRthE