立法會衞生服務界議員麥國風前日見董特首嘅時候，大鬧老董冇政綱，作為董競選辦主任嘅鄭維健想出聲，點知俾麥國風鬧番轉頭話：「呢度幾時輪到你出聲，你又唔係候選人。垃圾！」
堂堂鄭公子被人鬧係垃圾，真係非同小可，事後有人話麥國風膽識過人，但係更多人話佢冇乜禮貌！佢噚日就同八方澄清，話自己唔係鬧鄭維健垃圾，只係話成個選舉制度垃圾啫，而且佢叫鄭維健收聲之後，都係細細聲自己同自己講「垃圾」，冇估到有其他議員聽到，出到嚟又講俾其他人知。
無論如何，俾人鬧都係冇癮㗎嘞，鄭維健噚日陪老董見完旅遊界之後同八方講：「冇唔開心，只係可惜之嘛！」可惜啲乜？佢冇講到。


E-mail：[email protected]