近期城中的熱門話題之一是「公務員應否減人工」，辯論之激烈程度不亞於學生時代的「中學生應否談戀愛」。
如果係減人工就可以解決到問題嘅，咁就諗都唔使諗，手起刀落，減咗先算，可惜唔係咁簡單，減咗嗰份人工攤出嚟畀幾百萬人除，分分鐘只係每人納少十蚊八蚊稅。問題嘅癥結應該唔在於人工多少，而係有幾做得嘢。
自古以來，公務員除咗有鐵飯碗呢個優勢之外，起薪點好多時都會高過市面嘅私家工。天下間之所以會有咁着數嘅事，係因為想吸納人才，用高薪厚祿去吸引真正有學歷、有才幹、有領導才能嘅人傑入政府部門做嘢，為香港市民謀福利。
香港特區政府基本上已經有一個成熟嘅架構，但套用李光耀先生話齋，冇人才去領導，幾好嘅system都冇用，人才先係最寶貴。
如果真係做到嘢的話，我提議再加啲人工都冇所謂，因為理論上係政府領導大方向正確，市民得到嘅應該比付出嘅多過多多聲。若然查明係唔做得嘢，或者係揸流攤嘅，莫講話減人工，直情就應該效法《一筆OUT消》，同佢講聲：「對唔住，你係一毫子薪金都攞唔到，你要一筆out消，goodbye。」