701收料站:即時科研勿亂追

蘋果日報 2002/01/26 00:00


前日唔少股仔勁跌,噚日就見多隻股仔搏老命炒上,究竟係佢哋大把錢,定係怕再跌會被斬倉?真係考起。
好似衝浪平台(8178)咁,前日大跌,噚日就升番突,升足30%,收1.12元。至於同樣係做Linux軟件嘅即時科研(8400),噚日一開始拆細就勁升16.7%,收42仙。
即時科研舊年7月27日,以全配售形式喺創業板上市,當時係以每股1.19元,配售3450萬股新股,集資淨額只得3400萬元。喺台灣幫統領下,隻股淨係識得升唔識得跌,但聽聞幕後就散唔到貨。今次佢1拆10,以42仙收市價計,即係等於原來嘅4.20元,較半年前嘅招股價升足2.53倍。
其實創業板股仔炒高後拆細,即時科研唔係先例,而且往往係想散貨嘅先兆。即時科研上市快夠半年,大股東可以隨時出貨。相信唔使小初提點,大家都明白家陣隻股升係炒供求關係,當新股票到手之時,就係股價……。