當年今日

701收料站:建發牛皮有原因

蘋果日報 2003/01/21 00:00


小初早排聽班經紀朋友提過,建發(223)將有異動,但講完好耐都未見身郁,隻股噚日收1.14元,升1個價位。
經紀陳話,上個月建發公布以接近3000萬元,用於收購一個大陸資料庫及支付顧問服務費用。呢單交易據聞令芬佬不滿,股價一度跌穿1元,但收尾有人出嚟維持秩序,將股價掃番上1.10元樓上,但在1.25元就遇上阻力。
經紀陳話,呢單交易正唔正就見仁見智,但發行新股數量,剛好少於已擴大股本的10%,就非常有玄機,若果接貨者夠實力,就有好戲睇。不過,有關交易至今仍未完成,即係呢批新股重未出得街,所以冇辦法唔等一等。
另外,年輕賓架前日話盈新遊樂(703)搵緊人幫手,隻股噚日即刻升咗40%,收0.14元。年輕賓架打電話畀小初,叫小初咪亂咁跟進。盈新噚日成交金額3.52萬元,只屬乾升,小初係老江湖,點會亂咁上車。
慕容小初