說起香港長跑，以往多談及紀嘉文、陳家豪及姚潔貞等名將，不過黃尹雋在去年的10公里挑戰賽打破塵封15年的香港紀錄，及後再破5,000米及馬拉松港績，一躍成香港長跑界icon。屢屢跨越前人，黃尹雋反而顯得淡然：「我終極目標係做第一個跑奧運馬拉松嘅香港男運動員。」癡人說夢？「做乜嘢都好，放棄就會失去所有，堅持落去先會成功。」
記者：麥卓溢
攝影：梁志永、麥卓溢

有別一眾自中學已在田徑場上揮灑汗水的前輩，黃尹雋中學打籃球及射箭，與長跑沾不上邊。中六那年，他被邀請入越野隊「湊人數」，參加了人生第一場跑步比賽：「當時有打籃球學界，有整學界證，加上就快畢業，心諗一試無妨，就應承入隊。」升上大學後，同系師兄得悉他曾跑越野賽，遂邀請他加入大學越野隊：「我冇上莊（擔任學會內閣幹事），喺大學好得閒，無聊就去試吓。」四年前的無心插柳，令他踏上長跑之路。

半途出家重細節

首年大專賽後，黃尹雋開始與隊友出外參賽，系統化的恆常訓練加上比賽，使他在大學二年級時已突飛猛進，成績更勝有10年跑齡的隊友︰「Year 3加大訓練量，想試吓自己可唔可以喺大專賽拎到頭三，睇吓自己極限喺邊。」連續兩年在大專越野賽及田徑賽5,000米項目跑進三甲，令黃尹雋在長跑界漸露頭角，前年的港島10公里賽跑，更令他聲名大噪，皆因他只差五秒就能打破「香港首席鐵人」李致和所造出、塵封達15年的香港紀錄。黃尹雋坦言當刻有少許失望，不過如今回想，當年準備不足，心態亦未成熟：「比賽前一日仲會去打籃球，甚至開跑前五分鐘先到起跑線準備，好多地方做得唔好，破唔到紀錄好合理。」

調整心態重新出發，從休息到紀律，黃尹雋着重每個細節，終在去年10月的10公里挑戰賽將香港紀錄推快至30分51秒，5日後再在澳門城市田徑邀請賽再打破塵封41年的5,000米香港紀錄。狀態大勇的黃尹雋其後於12月的日本防府馬拉松跑出2小20分58秒，打破由英國跑手在36年前造出的舊香港紀錄。2個月內3破港績，黃尹雋終跑出自己的一片天，不過每每問及感受，他都顯得很淡然：「其實預咗，破紀錄只係最低要求，唔會將目標只係放喺紀錄上。」

聞者或覺是口出狂言，但知道黃尹雋所見所聞，或會明白這是他的肺腑之言。去年三月，他首次代表香港出賽，參戰國際田聯的越野跑世錦賽。雖知難與世界級選手匹敵，但無疑是次很好的經驗，令他體會到自己的不足：「落到場同其他選手平排，已經感受到佢哋嘅氣場；就算大家身形相若，但對手肌肉結實好多，自己個身仲鬆吓鬆吓。」黃尹雋深明要再進步，目光不可只放在香港：「你可以喺外國選手身上睇到點成為優秀運動員，佢哋好清楚自己目標，會做好每個細節。好多人講理想講目標，但如果唔可以化成實際行動，講再多都冇用。」「心態決定境界」雖是老掉牙的名言，但要在長跑路上成功，堅持確是不二法門。

望予港人正能量

長跑訓練動輒大半小時，相比身體上的疲憊，無盡的孤獨感或更難熬。黃尹雋笑言自己曾很怕悶，幸他一路走來，有一班同路人「齊上齊落」，才能抵住最初的孤獨感。跑友Louis與黃尹雋四年前跟隨同一教練練跑，初相識已感受其獨特氣場，Louis說︰「練跑一開始會緩步跑熱身，好多人都係教練點講就點跑，但佢（黃尹雋）成日會問『點解要咁跑？』、『跑咁長會唔會影響之後訓練或者比賽？』」他笑言黃尹雋是個現實的人，做事前會先考慮回報，甚至曾說過「香港跑步冇前途，點解仲要跑」？想不到現時成為三項港績保持者，甚至有意衝奧。

認清目標後，黃尹雋為跑得更快更遠，大學畢業後到中大攻讀體育運動科學系碩士。為期2年的課程本在今年5月完成，但就因反送中運動令第一學期提早結束，或打亂他的計劃。眼見兩間母校戰火連連，黃尹雋坦言：「喺新聞上睇到嘅畫面都好震撼，始終以往有好多時間喺兩間大學讀書、生活、練跑，係充滿回憶嘅地方。」黃尹雋坦言可為母校及香港做到的事不多，心情難免受影響，只望可靠成績帶給港人正能量。

不少年輕人過去半年「發夢」，夢想將香港變得更好；黃尹雋亦有個「奧運夢」，「發夢」成為首個出戰奧運馬拉松的香港男運動員。縱在起跑線落後，但志氣絕不比前輩低：「由細到大都希望做到件令自己驕傲、令人哋記住嘅事。容易嘅事其他人已經做過，困難嘅事先要你去做。」的確，夢想在實現前都是遙不可及，惟有堅持下去，才見黎明來到。正如黃尹雋兩破港績後說道：「6日2個香港紀錄，靠嘅只係一直堅持，香港人都可以一直堅持，成果總會來到。」