當年今日

五十年不變 - 左丁山

蘋果日報 2002/01/14 00:00


上星期股市先升後跌,今個星期是升是跌,木宰羊,事後就一定知。舊年年初預測恒指會升到萬八點嗰位大美資行仁兄已經升咗級,但實權減少,佢嘅同事預測恒指會在二○○○年尾跌到萬二點,梗係變成天才寵兒啦,做預測就係咁嘅嘞,成王敗寇,要為自己言論負責。
呢日食飯之前,碰到廠家朱,佢做成衣出口,兼營食品零售,先靠前者發財,繼而發展新生意,實行唔將幾隻蛋放在一個籃子內。成績如何呢?廠家朱話:「零售真係好難做,好彩冇放棄到老本行。呢幾年做到化化哋,忽然發覺鄧伯伯嘅保證──香港五十年不變──好有道理,原來我哋嘅經濟會五十年不變,大家都唔知未來增長靠乜嘢,點會變吖,唔變壞就求神拜佛咯。」
乜咁灰呀,香港人嘅搏殺精神去咗邊?廠家朱話:「我個仔喺中環打工,啲美國回流畢業生成日話想做ibanker,舊年俾佢望到,今年已經驚炒魷,事關佢哋啲行家紛紛縮皮,租開三層樓嘅,要退租一層,啲夥計退去邊?你都明㗎啦;啲美國老細話將啲資源轉為投入上海,回報率會更高、更有希望喎!」
如此環境,甲級寫字樓租金冇法子唔減,豪宅租金亦易跌難升。前星期聽法興證券嘅地產分析師謝琳在電台亦係咁講;謝小姐話見到啲行家紛紛縮皮,寫字樓收購股不宜購入也。