陳奕迅（Eason）同女友徐濠縈，前晚年初三兼情人節，被撞見喺跑馬地拍拖，見到記者影相，佢哋都蓮子蓉咁嘅面口，十分合作。

坐Audi離開
問Eason情人節點過，佢話：「乜今日（指前晚）係情人節咩，我以為係赤口咋！」問Eason有冇送禮物畀女友，佢又話：「赤口唔講嘢，我怕赤口講錯嘢。」無論記者問Eason乜嘢，佢都答呢個答案，大耍太極。
記者再問徐濠縈有冇收到情人節禮物，伊人笑而不語，亦冇回答記者嘅問題。然後佢哋急急腳上咗Eason架Audi座駕離開，Eason開車前重不忘同記者講：「情人節快樂！」

Twins網頁數目破紀錄
英皇人氣組合Twins嘅風頭確實係一時無兩，喺近年嘅樂壇上好少見。佢哋嘅fans層面，以學生哥最多，幾乎佔咗八成，所以fans整嘅Twins網頁，就多到接近一百五十個，可以話破晒全香港所有歌手同樂隊嘅網頁紀錄。佢哋咁受歡迎，唔怪得無論去到邊做宣傳，都迫到水洩不通啦。

章小蕙泰國做Facial即日來回
章小蕙真係都算特別，一舉一動都可以成為新聞，就好似佢去扮靚做facial，馮仁昭就覺得已經係單新聞。
話說有日馮仁昭打畀章小蕙，諗住問吓佢點過新年，點知佢話𠵱家準備飛去泰國做facial，以為佢去泰國度假，要過幾日先返，點知佢話嗰晚就返。佢去泰國即日來回，只係為做一次facial，真係大陣仗。相信貪靚貪成咁，香港真係無乜幾多個。