許志安（安仔）、張燊悅、王合喜和女優亞軍黃敏燁等，前晚在尖沙嘴嘉禾港威電影城，出席新片《互動殺人事件》首映。安仔談到今年的大計，就是希望拍攝喜劇。
「票房唔係我控制」
安仔去年除了着重音樂發展外，亦有拍電影，先後拍了《七號差館》和《殺科》兩套戲，不過《殺科》卻是去年十大票房最差的電影之一。
票房成績未如理想，問安仔可感失望，他說：「舊年我拍嗰幾部戲，都唔係高成本嘅電影，票房收入唔係我可以控制到，不過都冇失望，我一向都以唱歌為主。今年我希望可以試吓拍喜劇。」
安仔的紅顏知己鄭秀文去年拍多套喜劇，如《同居蜜友》和《瘦身男女》票房都大收，和安仔電影的票房可謂差天共地。那麼安仔是否受鄭秀文影響，故想拍喜劇呢？他說：「唔關事。」
張燊悅八卦脫癦
另外，張燊悅前晚穿着熱褲出現，露出美腿，叫人眼前一亮，問她怕不怕凍，張燊悅說：「呢晚熱咗咁多，唔凍。」記者留意到她嘴角邊的癦好像大了，張燊悅說：「冇大到，呢粒係銷魂癦，我唔會脫，但下顎嗰粒我就脫咗，因為有人話如果條脷伸落去掂唔到粒癦，唔係咁好，所以我咪脫咗囉。」
安仔秀文票房距千里
許志安去年電影票房
《七號差館》：243萬
《殺科》：46萬
總數：289萬
鄭秀文去年電影票房
《鍾無艷》：2724萬
《瘦身男女》：4043萬
《同居蜜友》：1820萬
總數：8587萬
採訪：魯萍
攝影：何國豪