局長示範幾忙都要睇猛片 - 李八方

蘋果日報 2006/01/21 00:00


香港青年協會噚日喺金鐘UA舉行《魔幻王國:獅子、女巫、魔衣櫥》慈善試映禮,總幹事王䓪鳴親自出馬,大家當然要畀面,出席名人好多,有演藝界亦有政界。
孫公同林D9噚日忙到死,一個要開房委會大會,一個要主持策發會,但係都趕及開場,重拖住太太嚟,非常恩愛咁款。
《魔幻王國》係迪士尼農曆年推出嘅猛片,故事講四個小孩為咗逃避戰火,意外闖入納尼亞魔幻王國呢個奇幻世界。孫公話,細個時好少睇外國故事,只係識刨《三國志》等中國歷史故事,至於對仔女,就乜都畀佢哋睇,非常開放。
林D9就比較追上潮流,佢話讀大學已經睇過本書,而個女(最近攞咗大律師公會獎學金嗰位)就好細個已經睇咗。林局長睇嚟冇吹牛,因為佢講到個主角最後嘅經過千辛萬苦,終於搵到致勝之道。
八方問兩位局長,農曆年去邊?佢哋都異口同聲話留港消費喎,真係愛港。
噚晚一共籌到四十幾萬,都算唔錯,為咗搞搞氣氛,青協重整咗個破冰儀式,等啲嘉賓攞住把寶劍扮吓嘢,有位小朋友喺台上致送紀念品,點知驚到喊晒,要王䓪鳴𠱁番。

傳真︰2623-9278
電郵︰[email protected]
empty
林瑞麟蹺住太太隻手,好恩愛咁入場,真係羨慕死人。