當年今日

採訪手記:
國內記者人海戰術駭人

蘋果日報 2002/05/30 00:00


中國是全球最多人口嘅國家,所以到濟州採訪嘅傳媒工作者亦多過人,部份外國記者見到龐大記者團都嚇咗一跳。

包旅遊車採訪
為方便到「中文球場」採訪中國隊操練,中國記者團就包了兩架旅遊車,唔少正在守候國足嘅外國記者,都以為係球隊專車,其實係過百名記者一齊到埗嘅墟冚場面,在場一位巴西記者同愛爾蘭記者都畀呢啲「人海戰術」嚇窒。
同巴西記者傾開,因為巴西將會同中國比賽,自然成為眾中國記者訪問對象,當然有問到點睇中國隊、球員同米路天奴域;不過佢哋好老實咁講,對中國球員認識唔深,但由第一日採訪中國隊開始已經不停被問呢類問題,當正佢係間諜一樣,但係佢話咁受中國記者歡迎都幾開心。

國內老記房間遭爆竊
講開國內記者,日前就發生咗一位中國記者所住酒店房被人爆竊,唔見咗二百萬韓圜現金同證件,加埋攝影器材,總共約損失六百萬韓圜。最重要係事發嘅酒店喺小記住個間嘅後面街,似乎南韓所謂標榜安全世界盃,只係顧到球員安全,無預到記者,認真擔心。