喺今屆美國底特律車展上，凌志展出咗一款全新嘅SUV車，並將之定名為GX470；據廠方表示，GX470嘅定位將會係介乎RX300與LX470之間，而且更係走中型SUV車路線㖭。
然而，全新GX470嘅造型望落雖與同廠嘅LX470相近，但經過重新設計嘅車尾配搭，則予人有一分新鮮感；當中以闊面板出現嘅尾燈組合，亦可給予尾隨車輛有明確嘅提示㗎。另外，GX470嘅車廂布局可謂極盡豪華，除備有皮椅外，桃木裝飾、高級音響及恒溫冷氣全部都有齊，享受極為豪華。另外更可加裝DVD影音系統、電熱座椅，以及MarkLevinson高級音響系統，從而令享受進一步提升。
機械配搭方面，新車將會起用現時LX470所採用嘅一台4.7公升V8引擎，但輸出數值廠方則未有公布；另外更會配置有多套電子系統，以增強行車表現。新車將會於2003年1月於美國推出，各位車迷記住唔好錯過喇。