當年今日

馬德里打吡大戰攞命
球驗客手記:上盤客血本無歸

蘋果日報 2003/01/21 00:00


我求大俠相信前晚皇馬對馬體會場波睇到啲上盤客慘叫連天,因為呢場波實在劇力萬鈞,到頭來都係要佢哋血本無歸。我老友事後孔明話齋:心臟有事嘅上盤客真係唔睇好過睇。
皇馬雖先輸十二碼,後有希古拉被逐,但之後皇馬仍有台型,果然完上半場時反超前二比一,上盤客可以安心;因為皇馬讓一球?球半,下半場皇馬唔難入多粒開上盤。
皇馬下半場依然對辦,只係佢哋硬係入唔到波,比賽末段費高重大腳勁抽十二碼省到貝高斯個鼻流晒血,最後都係唔入,相信捧場客已經心如鹿撞;諗住輸半個盤都算嘞,點知阿伯天尼補時射入自由球,扳成二比二完場,結果輸晒。唉!世事就係咁㗎嘞!
打吡戰周不時都有啲戲劇性,實搶晒同時間踢嘅祖雲達斯對基爾禾鏡,因為只係讓平手?半球嘅祖記半場已經領前兩粒,上盤定過抬油,同捧皇馬上盤嘅心情真係爭好遠。或者呢兩場波唯一相同之處係極刑多,一共有六個,真係罕見。

施文道行一朝喪
平日懶有gentleman風度嘅阿仙奴門將施文,喺對韋斯咸場英超聯,畀人影到佢向敵對球迷展示不文手勢,我求大俠覺得佢千年道行一朝喪,話晒球迷唔係買飛入嚟畀你咁對待嘛。另外,伯金呢場波好蠱惑,有幾次向對手抽水都唔使領黃,而其中一次更係用手肘打保耶塊面,唔趕出場,上盤客真係偷笑,賽後重話係意外,擘大眼講大話,薑果然愈老愈辣。
楊晨批死肥仔嘜
連甲A都唔要嘅加斯居尼突然有生機,傳德乙聯包尾球隊聖保利可能簽佢,但聖保利嘅中國前鋒楊晨就唔多睇好呢次交易。楊晨話肥仔嘜都成三十五歲人,性格依然火爆,重話佢為球隊帶嚟嘅經濟效益亦有限。一個英格蘭一代球星,竟然畀人批死到咁,連我求大俠個鼻都有啲酸。

「大頭」鬧人先鬧自己
我求大俠都做過細路,明白見到偶像會心花怒放,點知嗰個畀愛華頓棄用嘅李瑋峰就係咁傷咗一個球迷個心。話說國內一個初中女孩想要李瑋峰簽名時,畀佢拒絕之後,亦因為嗰個女孩話佢心情唔好,同埋稱呼佢個花名「大頭」而火都嚟埋,結果重要捱罵。大頭,心情唔好咪搵個細路女出氣好喎!

麥基迪愈噓愈精神
NBA魔術隊嘅麥基迪噚日「重返故地」倒戈對速龍嗰場波,全場俾球迷噓到七彩,但佢就喺噓聲中愈戰愈勇,攞到三十五分同十一個籃板,幫球會贏波,佢賽後重多謝啲速龍球迷嘅噓聲激發佢嘅鬥心咁話。睇番近排嘅盤路頻頻開下盤,就因為全賴麥基迪呢啲球員先至有啲上盤開吓!