永隆銀行2008年賣畀招商銀行（3968）後，創辦人伍宜孫與伍絜宜家族嘅後人有乜搞作呢？唔講唔知，永隆第三代離開永隆後，其中有三位堂兄弟創辦一間財務公司，仲幫手成立物業融資協會，為業界發聲。
同永隆個名幾相似嘅永時信貸（Wings Finance），2014年成立，聯合創辦人包括伍宜孫長孫，即係伍步高長子伍尚宗（Arthur），仲有伍絜宜嘅孫仔伍尚匡、伍尚敦，三位係堂兄弟。
英語流利嘅Arthur，分別喺加拿大與倫敦完成商學士同法學士，回港後，有段短時間任職大律師，之後轉做事務律師。Arthur同華華講，曾於永隆效力兩年，專責睇好多法律事務，賣盤後就冇乜動力做落去，2009年已經離開永隆。
有日Arthur跟堂兄弟傾偈，發覺大家其實仲想做銀行業務，「我熟法律，伍尚敦係做會計師出身，熟信貸風險，各人專長好夾，就開咗間財務公司，可以話係永隆之後嘅延續。」
而政府推出辣招與金管局收緊按揭，亦刺激到財仔生意，令呢瓣生意非常之有利可圖。

伍步高周圍去旅行

至於Arthur爸爸伍步高冇做永隆董事長之後，呢幾年做乜呢？咁當然係嘆緊世界喇，都已經80歲，得閒約埋三五知己飲茶，兼且周圍飛去旅行喇。
永隆係由伍宜孫喺1933年創立，第一間永隆銀號位於上環文咸東街，恒生（011）創辦人何善衡、永亨創辦人馮敬堯都係股東之一，伍宜孫弟伍絜宜協力經營。1960年改名為永隆銀行。

李華華
mailto:LiWaWa@AppleDaily.com