是日恒指大升240點，C輪揸家眼前一亮，P輪揸家眼前一黑。炒輪嘅嘢，三更唔知四更事，富完可以窮，窮完可以再富。好似本周一推介隻中銀C輪4760，上周收70仙，前日最低得番52仙，26%輪價變咗雪水。但昨日，癲上1.03元收市，最低價上車嘅，撈咗幾乎1倍，隔晚揸咗賺75%。
國指升80點，冇氣嘅係中電信（728），收2.825元，跌5仙，拖低國指8點。趁中電信跌，買中電信C輪。
中電信C輪4500：中電信今年上半年賺147億元人民幣，冇變化咁滯，每股盈利由0.19元降到0.18元。表面睇，麻麻。
不過望吓大行賽前估計，大摩估佢賺110億元，美林估佢賺112.2億元，雷曼估佢賺115.90億元，BNP估佢賺120.3億元。𠵱家跑出成績賺147億元，盤數靚定唔靚，大家有眼睇。Sellingonnews之後（唔理好定壞），中電信以8倍幾嘅PE，好難唔升番上去。
睇好中電信，搵C輪炒，幾乎冇得揀，惟獨4500。
隻輪成交份數逾1億，金額17球，最旺係佢。由3周前高位碌落嚟，散咗近7成。收復部份失地，未必肥到綁唔到鞋帶，但調轉頭如果撞板，風險相對都少啲。
章盛