皇家馬德里王牌球星基斯坦奴朗拿度，星期三晚喺球隊主場小勝曼城1:0嘅歐聯4強次回合傷癒復出，雖然佢未回復最佳狀態，不過佢下半場一次喺對方龍門前跳起雙手將個波拍入網，成個雙手入樽動作咁，睇嚟之前皇馬2月喺球隊操練時候嘅籃球特訓真係有用喎。

C朗呢個手球當然唔計入球啦，而且佢之前明顯越位，旁證亦都舉咗旗示意，所以佢同球證解釋之後都唔使領牌，認真好彩。其實球員喺足球場上手球嘅情況並唔罕見，最經典當然係阿根廷球王馬勒當拿，喺1986年世界盃8強淘汰英格蘭嗰場比賽嘅「上帝之手」，巴塞隆拿球星美斯2007年亦試過喺對愛斯賓奴嘅比賽手球入波，另外，亨利喺2009年法國對愛爾蘭嘅世界盃外圍賽附加賽，踢到加時用手攞波之後助攻畀隊友入波，以2:1淘汰對手而拎到世盃入場券，至於近期就有AC米蘭嘅巴洛迪利，喺球隊輸畀祖雲達斯嘅比賽蓄意手球拍個波入網，結果入球唔計之餘仲領到黃牌，都唔知應該話佢抵死定係唔好彩啦！