新車速報:起亞Carnival 搶攻MPV市場

蘋果日報 2002/04/02 00:00


相信有不少車迷都覺得,韓國車向來以較低廉嘅價錢去取悅買家,但質素卻只屬一般;不過隨着技術嘅提升,韓國車嘅質素明顯較以前來得更高。就以今日呢部頂級新版起亞CarnivalGS2.5V6MPV為例,佢除咗質量較前有所提升外,豪華程度更絕不遜於日本嘅同級車㖭;加上一台擁有強勁馬力輸出嘅2.5公升V6引擎,相信定能惹來不少車迷垂青㗎。

記者、攝影:黃凱穎
圓渾造型富吸引力
先從外形方面說起,雖然大家眼前呢部新版頂級CarnivalGS2.5V6,與先前抵港嘅型號相近,但全新頭泵把及鬼面罩組合、望落更有神氣嘅頭燈等等嘅改變,從而令其變得更具吸引力;加上開啟幅度甚大嘅尾門,配合低地台設計,上落行李變得更方便外,左右雙趟門亦有利於乘客進出車廂㖭。而車尾部分更設有高置尾翼,既美觀之餘又能收穩壓之效。


2.5V6引擎動力充裕
而新車所採用嘅一台2.5公升V6引擎動力輸出充裕,匹配一套4前速全自動波箱,用以驅動此車可謂綽綽有餘;運作時又見順暢寧靜,從而能為車上乘客,帶來一個舒適寧靜嘅旅程享受。而由前輪麥花臣支柱,及後輪五連桿所造成嘅懸掛系統,配合剛勁有度嘅車架,亦能令新車有不錯嘅路面循迹性㗎。
多變車廂添實用性
車廂方面,Carnival與其他大型MPV一樣,布局同樣來得靈活多變;除遇有需要時,可將以高級真皮鑲嵌而成嘅座椅收摺放平,以增加尾廂載物容量或形成敞大嘅卧鋪外,中排座椅更可作360度旋轉,將椅背放平後更可作桌几之用㖭,使用時極之方便。另外,由於波棍被置於中控台上,故此能營造出Walk-through嘅功能。
而車廂設備配搭亦見齊全,中控台除備有入時吸引嘅大面板音響及原廠冷氣外,更備有真皮軚環、天窗及桃木裝飾等等嘅豪華配備,真可謂一應俱全㗎。


記者試後簡評 優點 外形: 造型成熟大方,開啟幅度甚大嘅尾門,上落行李時亦增添不少方便。 車廂: 真皮配搭豪華外,座椅編排靈活多變實用。 設備: 配備一應俱全,兼屬觸手可及嘅設計。 操控: 引擎表現順滑,行車亦見寧靜。 缺點 1. 引擎雖運作暢順寧靜,但稍嫌欠缺一分爆炸力。 2. 車價稍高,或未能迎合部分用家要求。
起亞CarnivalGS2.5V6規格 引擎: 2497ccV6DOHC 馬力: 180ps/6000rpm 扭力: 22.4kgm/4000rpm 傳動: 4前速自動波 懸掛: (前)麥花臣支柱 (後)五連桿 制動: (前)透氣碟 (後)鼓式(ABS) 輪胎: 215/70R15 尺碼: 4925×1900×1805mm 軸距: 2905mm 車重: 1903-1955kg 新車售價: $199,900 車輛提供: 起亞汽車(27609933)