上周六NBA季後賽，雷霆作客以119:108擊敗小馬，總場數領先到3:1，再贏一場就可以晉身西岸四強。兩隊今場充滿火藥味，攻入19分嘅雷霆主將杜蘭特（Kevin Durant）仲喺最後一分鐘惡意犯規被逐㖭。

惡意犯規被逐離場

當今場剩返最後51.8秒，小馬後衞J安達臣（Justin Anderson）搶到進攻籃板想補籃嗰陣，KD突然從後兜巴打落佢塊面度，就連坐喺場邊嘅奴域斯基（Dirk Nowitzki）睇到都嚇親；球證亦即時吹罰KD二級惡意犯規，仲將佢驅逐離場，更加要出動到保安護住佢出場，費事主場球迷忍唔住追打呢位球星。KD就話呢次犯規只可以用「不幸」去形容，佢話：「喺常規賽期間，我有唔少成功嘅封阻都係咁從後拍落去。今次我只係唔好彩打中J安達臣個頭。」不過，KD都承認自己嘅舉動係惡意犯規，仲即時向J安達臣道歉：「我同意球證嘅吹罰，但即使呢個係惡意犯規都好，我都唔係特登打佢，更加唔係想整傷佢㗎。」

呢場充滿火藥味嘅比賽入面，點只得KD呢次衝突場面呢？第二節只係開始咗29秒嗰陣，雷霆後衞R科耶（Randy Foye）失手將個波掟咗出場外，坐喺後備席嘅莫路（Anthony Morrow）執到波之後，竟然唔想將個波交畀小馬嘅美利（Salah Mejri），搞到爭啲釀成打鬥場面。
最搞笑嘅係，球證竟然冇吹罰莫路，反而美利同韋斯卜克（Russell Westbrook）就因為差唔多鼻貼鼻咁兇對方，而各得一個技術犯規。呢次判罰亦為佢哋下一次衝突埋下咗伏線，當韋斯卜克喺第三節剩低3分44秒上籃嗰陣，美利一手扯住佢件波衫，扯到佢落地；今場交出「雙雙」25分15助攻嘅韋斯卜克，之後嬲到爆粗咁鬧場邊嘅球迷㖭。

迪朗傷出提早收「咧」

至於小馬今場真係輸波折將，迪朗威廉士（Deron Williams）只上陣一分鐘就因傷退下火線，教練卡利奧（Rick Carlisle）承認呢位首席控衞會提早收「咧」。不過射入27分嘅奴域斯基就話自己會奮戰到最後一刻，希望帶領球隊自2011年後再次喺季後賽晉級。