義賣心意卡籌款救地球
馮仁昭四圍超：紅姑教董特首搞環保
鍾楚紅（紅姑）身為香港地球之友嘅環保大使，對環保工作自然不遺餘力。
噚日紅姑就將自己多年嘅攝影作品製成心意卡，喺灣仔地球之友總部舉行名為「寸草心環保知識下鄉」嘅義賣簽名會，吸引咗幾十位影迷到場購買心意卡同要求同紅姑簽名及合照。
噚日紅姑着咗件恤衫到場，可能因為天熱關係，所以佢扣少咗幾粒衫鈕，身材呼之欲出，當佢見到記者影相嗰陣，就即刻扣埋啲鈕。
寫投訴信
講到生於斯長於斯嘅香港，紅姑對特區政府嘅環保施政就有彈冇讚，佢話：「其實維港景色好浪漫，唔知點解政府填海搞到愈嚟愈醜。人哋上海中央圖書館就學歐洲嘅建築，香港中央圖書館就學廣州。係要討好中國都學北京啦。」紅姑話唔排除遲啲寫信畀特首投訴。
余安安女兒睇戲解悶
余安安嘅兩個女兒Marcia和Sasha前晚喺傭人陪同下，到灣仔會展睇新片《小孩不笨》首映。問到兩個細路女點解父母冇陪佢哋嚟，Marcia話：「因為媽咪要留喺屋企睇世界盃，爹哋就約咗朋友食飯，而我又唔鍾意睇波，所以咪同妹妹一齊嚟睇戲囉！」佢哋前晚甫到場，就好識做咁到宣傳板前簽名同影相。
李蘢怡缺乏性教育
新人李蘢怡噚日出席香港電台「性本善孩子Q&A」活動，佢講番以前細個嗰陣父母都冇同佢灌輸性教育。李蘢怡話：「今日（即昨日）嚟過呢啲活動，我先知其實父母同子女講性教育，一啲都唔尷尬，我聽完之後，以後都可以挺起胸膛做人。」
姚瑩瑩莫家堯靠世盃𢱑銀
世界盃唔單止帶旺咗酒吧嘅生意，亦帶挈咗一啲藝人搵錢，好似姚瑩瑩同埋莫家堯，就喺世界盃舉行期間，去六間酒吧同啲客人玩遊戲，每人有六位數字酬勞。前晚佢兩個就去咗尖沙嘴修士吧，當時播緊阿根廷同英格蘭嗰場賽事，現場人頭湧湧，重差啲迫咗姚瑩瑩落地，姚瑩瑩話自己呢排要拍劇冇時間睇波，前晚係佢睇嘅第一場波。
黃伊汶為環保籌款
黃伊汶噚日去咗柴灣出席「世界自然（香港）基金會慈善獎券熱賣日」，佢即時唱歌表演，現場氣氛非常熱烈。黃伊汶更即場呼籲大家要有保護海洋環境嘅意識，而佢個小師弟Juno都有嚟助陣，佢哋參與呢個活動，為大會籌咗唔少善款。
湯寶如體檢怕被摸
湯寶如噚日去咗中環麗嘉酒店，出席無綫嘅健康宣傳活動。湯寶如話佢會同潘芳芳及陳國邦合作拍咗一段宣傳短片。問到湯寶如平時會唔會定期做身體檢查，佢話：「我大約一年做一次檢查，都會做埋婦女檢查，對於檢查時俾人摸摸吓，真係都尷尬㗎。」
克勤珍珠末𠱁女友
李克勤噚日去咗荃灣，出席「位元堂」分店開幕典禮，佢呢排為無綫主持世界盃，又要拍音樂特輯，所以佢都分身乏術。
克勤話：「我都有食佢哋嘅產品提神，而亦有攞珍珠末畀女友駐顏。」對於有傳王菲加盟環球唱片，李克勤重話歡迎㖭！
甄妮歎煙酒害人
甄妮同女兒Melody噚日喺美國返香港，就即刻去咗金鐘睇戲。甄妮提到近期喜事多，不過傷心事亦唔少，特別係契爺張徹導演，肺積水入咗醫院，情況麻麻。多年拍檔羅文又病情一般，更慨歎兩人都係煙酒累事，如果後生嗰陣時，多加節制就唔會咁樣喎。