有日喺屋企睇緊一啲講賽車嘅DVD嗰陣，細妹娛思突然好正經咁同我講：「啲落場用嘅賽車開得咁快，肯定好嘥油……」講完之後就咁行咗去，真係唔太明佢想講乜；不過坐喺度諗咗一陣，吖，佢又講得有道理，啲落場用嘅戰車要喺條Track度同其他對手鬥快，用嘅油就一定多啲㗎啦，咁其實對環境嚟講似乎唔係咁好。
或者因為咁，瑞典Volvo喺今屆瑞典房車賽（STCC）中，特別派出全新S60戰車參賽，但原來呢部戰車係身懷秘技嘅；所謂嘅秘技，就係佢所用嘅燃料並唔係傳統汽油，而係特別嘅E85環保燃料。呢款名為E85嘅環保燃料，其實係以85%乙醇及15%汽油混合而成，佢唔單止表現同傳統汽油一樣，而且仲可以有效減少喺廢氣入面嘅懸浮粒子，從而達致減低對空氣嘅污染。吖，晤知係咪因為佢夠環保，所以上天特別眷顧佢，令佢喺STCC第一個站賽事出戰就即刻拎到個冠軍返嚟呢！