當年今日

祖國溫室蜜瓜初抵港

蘋果日報 2002/08/02 00:00


夏天零舍多瓜,水果中,有西瓜、蜜瓜、哈密瓜,今年瓜果大造,可謂好抵食。唔知道大家有冇試過圖中呢款瓜呢?佢原來係蜜瓜嘅一種,聽講呢種蜜瓜係取日本蜜瓜種,然後喺國內以溫室種植,所以比較經濟抵食,重係今年首次抵港咋!
溫室蜜瓜外表鮮黃色,有啲似台灣香瓜,Size細細,每個大概三磅零重,肉質則係橙色,爽脆食味清香,貨源有限關係,暫時喺部份果檔至搵到佢。
南非急凍鮑魚螺經濟之選
鮑魚咁矜貴,唔係個個都食得起,不過我哋啲有創意嘅家庭主婦總會想到方法去為屋企人帶嚟新鮮口味嘅。好似我就有時會用一種酷似鮑魚嘅鮑魚螺嚟做餸,價錢就平得多。
呢種鮑魚螺嚟自南非,除咗個樣似鮑魚,連口感都似似哋。鮑魚螺可以用嚟煲湯,有滋陰明目嘅作用。煲完湯後將螺肉切片,打個蠔油芡又成一道菜式,非常經濟。

文:肥師奶