方力申全面公開打扮珍藏
蘋果日報 2002/05/03 00:00
要方力申Show珍藏，可能你會即刻諗到一屋都係的獎牌獎狀，但要講潮流時裝，當然要Show至愛的衣衫鞋襪同配件。方力申的時裝珍藏，原來好多都與游水及運動扯上關係。T恤Cap帽手表及太陽眼鏡，未必名牌好潮流，但件件講感情有紀念性。無錯，珍藏不一定要貴到飛起好罕有，最緊要對於自己有意義。
記者：梁珮瑜 攝影：陳盛臣
記者：梁珮瑜 攝影：陳盛臣
99年方力申在美國讀書已加入學校游泳隊，而泳隊每次比賽會設計一款T恤作隊服，當年Alex就與另外兩位隊友擔起此重任，而這件Tee亦成為他的珍藏。「前面圖案就好似超人的Logo，但就將原本的S字改成為D，因為我們的教練叫阿Dick。」
除因為是自己有份設計而甚具紀念價值，這件Tee亦曾經令他不愉快。「後面圖案的靈感是來自NBA紐約隊的MarcusCamby，他手臂上有『勉族』兩個中文字紋身，我就改為『狄族』，可以解作阿Dick的一族。」Alex還託在香港的父親找書法家，寫下這兩個字然後寄回美國。「佢哋唔識睇中文字，結果將兩個字掉轉印而變了『族狄』，我見到覺得好唔開心。」後來隊友安慰Alex話圖案靚就得，得佢一個中國人，無人識睇唔知係搞錯，但Alex就始終提起都感到有點遺憾。
香港游泳隊的T恤，前面有泳隊的會徽，而特別之處就在T恤後面的英文字。
「特別在通常只會有『HONGKONGCHINA』，但呢件有埋『SWIMMING』就只係出過一次。加上𠵱家少咗游水，就更加對呢件衫有感情。」這件「絕版Tee」對於方力申來講，可能就相等於你買到Number(N)ine一樣咁矜貴。
男孩子通常都有一兩頂帽傍身，Cap帽最Basic、賊仔帽可以扮有型、漁夫帽就裏原宿Look必備。而方力申就獨愛Cap帽，家中起碼有40頂，「主要係自己懶，讀書時要晨早起身，無時間理個頭，戴帽夠方便又可以好快出門口。」而款式全部以簡單為主，最緊要係Flexfit款，即帽後用橡筋，無得調校鬆緊，事關佢會反轉頂帽戴，有個扣覺得唔多好睇。
一次方力申在某場合偶遇TagHeuer豪華表負責人，講起豪華表Alex就如數家珍，可以講出歷代廣告代言人，型號功能亦同樣好熟悉。負責人覺得Alex實在好欣賞呢個牌子，加上Alex運動員的健康形象亦與品牌好合襯，所以就名表贈力申，送上Monza一隻。「我16歲時有個隊友戴TagHeuer，見過以後就鍾意咗呢個牌子，覺得佢不但止具功能，係賽車指定計時，而且形象都好好，好多廣告都係用一級運動員，好似碧加同李安納度。」
剛成為法國護膚品牌子BiothermHomme的代言人，皮膚當然要夠健康先有說服力。知道游泳池的氯氣會令皮膚同頭髮變差，方力申長期練水就必定受影響，但見佢皮膚真係唔差又健康，原因可能係夠年輕加阿媽的功勞。「每日浸響泳池幾個鐘，皮膚同頭髮都幾傷。以前都係用阿媽嗰啲洗面膏同Lotion，入咗行先開始留意護膚。」Alex之前都有用呢個牌子，現在做埋代言可以免費任用就當然開心。
「我唔追潮流，最緊要啱自己同簡單就OK。Reebok贊助了我4年，𠵱家又有人幫我買衫，所以自己都好少去買衫。」當然簡單Basic就最穩陣，但亦可以再誇啲，事關覺得佢都型得起。
見到心頭好又唔夠錢，相信你會即時碌卡，但Alex16歲時睇中副名牌太陽鏡要二千幾蚊，考慮3年後先捨得買，唔揮霍大家真係要學吓。「我鍾意太陽眼鏡，可能買咗都係戴一次，但就好鍾意買。」𠵱家當然買個夠，重儲有十多副，唔一定係名牌但最緊要個款靚及鏡片色調柔和。
Biotherm（29722334）
銅鑼灣皇室堡西武百貨地下
銅鑼灣皇室堡西武百貨地下