當年今日

一周兩件:跌破供股價麗國抵博

蘋果日報 2005/07/17 00:00


麗新國際(191)最近一個星期陰乾回落,較上個月每股供股伸手價0.5元跌13%,跌夠兩成,見0.4元,抵博。麗國呢期供股,新增9282萬股,由於認購唔足額,又有大孖沙要上身,要包銷8670萬麗國新股。麗國現價0.435元,較伸手價唔見6.5仙,涉及包銷股份,帳面暫時係咁易唔見五球半,大孖沙又要諗計。又麗國最新呢期供股,新增股數佔供股前已發行股數不過區區6%,係細數目,加埋資產底厚,所以資產攤薄效應唔係咁大,NAV由05年度中期(1月止)1.58元,攤薄到家陣1.4元,資產折讓69%,講緊重係好吸引水平。麗國現價上番伸手水面價0.5元,潛在回報近15%,但對部份投資者嚟講,只係起步階段,股價再跌落0.4元博反彈,淨係計上番水面價,潛在回報率實牙實齒25%,之後嘅當bonus,值博率更加充份。

滙漢價殘博反彈
滙漢(214)嚟緊星期二(19日)派05年度(3月止)成績表,對上星期五,微升2%,開始畀反應,又講兩點:第一,滙漢04年度勁蝕兩億銀,05年度因有淺水灣豪宅入帳,虧轉盈,冇問題,保守計,純利7000萬銀,有番個位數PE睇。第二,呢期業績股好惡搞,盈警股插水唔出奇,交到成績嘅一樣照插水。但要咁睇,滙漢股價表現,實情打樁咁打,現價重棟喺近1年低位,距離04年10月高位4.1元足有4成幅度,保守估計NAV7蚊,現價折讓65%,殘到無倫,所以,唔係偏向虎山行。滙漢上番今年頭2.75元至3蚊密集區,NAV收窄幅度只係區區8%。
錢雋